ಅನುಶ್ರೀ...ಕಡೆಗೆ ಉಳಿಯುವುದು ಮಾನವೀಯತೆಯಷ್ಟೆ: ಈ ಮಾತನ್ನು ರೇಖಾರಾಣಿ ಹೇಳಿದ್ದೇಕೆ..?

By Infoflick Correspondent

Updated:Saturday, April 9, 2022, 11:31[IST]

ಅನುಶ್ರೀ...ಕಡೆಗೆ ಉಳಿಯುವುದು ಮಾನವೀಯತೆಯಷ್ಟೆ: ಈ ಮಾತನ್ನು ರೇಖಾರಾಣಿ ಹೇಳಿದ್ದೇಕೆ..?

 

ಆಂಕರ್ ಅನುಶ್ರೀ ಅವರ ತಂದೆ ಇತ್ತೀಚೆಗಷ್ಟೆ ಮಾಧ್ಯಮಗಳಲ್ಲಿ ಹೇಳಿಕೆಯೊಂದನ್ನು ನೀಡಿದ್ದರು. ನಾನು ಅನುಶ್ರೀ ತಂದೆ, ಅವರ ಏಳಿಗೆ ಕಂಡು ಖುಷಿ ಪಟ್ಟಿದ್ದೇನೆ. ಆದರೆ ನನ್ನನ್ನು ನೋಡಲು ಅನುಶ್ರೀ ಬಂದಿಲ್ಲ. ಪರವಾಗಿಲ್ಲ ನಾನು ಸತ್ತಾಗ ಬಂದು ಮಣ್ಣು ಹಾಕಲಿ ಎಂದಿದ್ದರು. ಆದರೆ ಅನುಶ್ರೀ ಈ ಬಗ್ಗೆ ಯಾವ ಮಾತನ್ನೂ ಆಡಿರಲಿಲ್ಲ. ಅಷ್ಟೇ ಅಲ್ಲದೇ, ಅನುಶ್ರೀ ಅವರ ಮನಸ್ಸಿನಲ್ಲಿ ತಂದೆಯಿಂದ ಅವರ ಮನೆಯಲ್ಲಾದ ಕಷ್ಟಗಳನ್ನು ನೆನೆದು ಮನಸ್ಸನ್ನು ಗಟ್ಟಿ ಮಾಡಿಕೊಂಡಿದ್ದರು. ಇದಕ್ಕೆ ನಿರ್ದೇಶಕಿ ರೇಖಾರಾಣಿ ಅವರು ಫೇಸ್ ಬುಕ್ ಪೇಜ್ ನಲ್ಲಿ ಅನುಶ್ರೀ ಅವರಿಗೆ ತಿಳಿ ಹೇಳಿದ್ದಾರೆ. 

ಅನುಶ್ರೀ...ಕಡೆಗೆ ಉಳಿಯುವುದು ಮಾನವೀಯತೆಯಷ್ಟೆ!
ನೀನು ಪಡಬಾರದ ಕಷ್ಟಪಟ್ಟಿರುವುದು, ಜೀವನ ತೂಗುಯ್ಯಾಲೆಯಂತೆ ಆಡಿ ಮೇಲೆ, ಕೆಳಗೆ ಬೀಳಿಸಿದ್ದು ಎಲ್ಲದಕ್ಕೂ ಕಾರಣ ನಿನ್ನಪ್ಪ ಅಂತ ನನಗೆ ಗೊತ್ತು. ಆದರೆ ನಾವು ಮಾಡುವ ಒಳ್ಳೆಯ ಕೆಲಸಗಳು ಅವರು ಮಾಡಿರುವ ನೋವುಗಳನ್ನು ಮರೆಸುತ್ತದೆ. ನನಗೆ ಗೊತ್ತು ನೀನೆಷ್ಟು ಒಳ್ಳೆಯವಳೆಂದು. ಒಂದೇ ಒಂದು ಬಾರಿ ಅಪ್ಪನನ್ನು ಕ್ಷಮಿಸಿಬಿಡು.

ನನ್ನ ತಂದೆ ಹೀಗೇ ಅಮ್ಮನನ್ನು ಬಿಟ್ಟುಹೋಗಿ ಯಾರದೋ ಜೊತೆ ಸಂಸಾರಮಾಡುತ್ತಾ ಕಡೆಗಾಲದಲ್ಲಿ ಗ್ಯಾಂಗ್ರಿನ್ ಆಗಿ ಆಸ್ಪತ್ರೆ ಸೇರಿದರು. ನಾನಾದರೂ ಮನೆಯವರಿಗೆ ತಿಳಿಯದಂತೆ ಅಪ್ಪನ ಸಂಪರ್ಕದಲ್ಲಿದ್ದೆ. ಆದರೆ ನನ್ನ ಸಹೋದರಿಯರು 18 ವರ್ಷಗಳ ಕಾಲ ಅವರ ಮುಖ ಕೂಡಾ ನೋಡಿರಲಿಲ್ಲ. ಅಪ್ಪ ಕರೆಮಾಡಿ ಸಹಾಯಮಾಡು ಎಂದು ಅತ್ತಾಗ ನಾವು ಮೂವರೂ ಹೆಣ್ಣುಮಕ್ಕಳು ಅಮ್ಮನ ಛಲ, ಹಠದ ಕಾರಣದಿಂದ ಓದಿ ಆರ್ಥಿಕವಾಗಿ ಬಹಳ ಸದೃಢರಾಗಿದ್ದೆವು. ನಾನು ' ಕೋಪ, ದ್ವೇಷ ಮರೆತು ಅಪ್ಪನನ್ನು ನೋಡೋಣ. ಇಲ್ಲಿ ಕಡೆಗುಳಿಯುವುದು ಮಾನವೀಯತೆಯಷ್ಟೆ' ಎಂದ ತಕ್ಷಣ ನನ್ನಿಬ್ಬರು ಸಹೋದರಿಯರು ಹಣದ ಚೀಲದ ಸಮೇತ ಅಪ್ಪನನ್ನು ನೋಡಲು ಹೊರಟೆವು. ಮೂವರು ಮಕ್ಕಳು ಮೂರು ಪ್ರತ್ಯೇಕ ಕಾರ್ ಗಳಲ್ಲಿ ಇಳಿಯುವುದನ್ನು ನೋಡಿ ಅಪ್ಪ ಕಣ್ಣೀರಾದರಂತೆ. (ಹಾಗಂತ ಅವರ ಪತ್ನಿ, ಮಕ್ಕಳು ಹೇಳಿದ್ದು).

ಬರೀ ಅಮ್ಮನ ಕಷ್ಟಗಳನ್ನೇ ನೋಡಿ, ಅಪ್ಪನ ಸುಖವನ್ನೇ ಕಾಣದಿದ್ದ ನಾವು ಮೂವರೂ ಅವರ ಮುಂದೆ ನಿಂತಾಗ ಅವರಿಗೆ ಮಾತೇ ಹೊರಡಲಿಲ್ಲ. ನನ್ನ ತಂಗಿ ಪುಟಾಣಿಯಿದ್ದಾಗ ಬಿಟ್ಟು ಹೋದವರು ಪುಟ್ಟ ಯುವತಿಯನ್ನು ನೋಡಿ ಸಂಭ್ರಮಿಸಿದರು. ಕೋಪದ ಮೂಟೆಯಾಗಿರುತ್ತಿದ್ದ ನನ್ನ ತಂಗಿಯ ಬಗ್ಗೆ ನನ್ನಪ್ಪನಿಗೆ ಅಪಾರ ಭಯ. ಅವಳ ಮುಂದಿನ ಪ್ರತಿಕ್ರಿಯೆಯನ್ನು ಆತಂಕದಿಂದ ನೋಡುತ್ತಿದ್ದರು. ಅವಳು ತನ್ನ ಜೀವನದಲ್ಲಿ ಅಪ್ಪನ ದುರಂತ ನಡೆದೇ ಇಲ್ಲವೇನೋ ಎಂಬಷ್ಟು ಸರಳವಾಗಿ ಅವರ ಬಳಿ ಧಾವಿಸಿ ಅಪ್ಪಿ ಹಣೆಗೊಂದು ಮುತ್ತುಕೊಟ್ಟು, ಗ್ಯಾಂಗ್ರಿನ್ ಆದ ಕಾಲ ಮೇಲೆ ಕೈಯಾಡಿಸಿ ಕಾಲಿಗೊಂದು ಮುತ್ತುಕೊಟ್ಟುಬಿಟ್ಟಳು. ಆ ಕ್ಷಣ ನನ್ನಪ್ಪನ ಮುಖದಲ್ಲಿ ಉಂಟಾದ ಪ್ರೀತಿ, ಅಸಹಾಯಕತೆ, ಕೀಳರಿಮೆ, ತಪಿತಸ್ಥ ಭಾವನೆಗಳ ಸಮುದ್ರ ನೋಡಿದೆನಲ್ಲ...ಇಂದಿಗೂ ನಾನು ಆ ಕ್ಷಣಗಳನ್ನು ಮರೆತಿಲ್ಲ. 

ಮಾರನೆಯ ದಿನ ಬೆಳಿಗ್ಗೆ ಆಪರೇಷನ್ನಿಗೆ ಹಣ ಕಟ್ಟಿದ್ದಾಯ್ತು. ನಮ್ಮಪ್ಪ ಇಡೀ ಆಸ್ಪತ್ರೆಯಲ್ಲಿ ಓಡಾಡುತ್ತಾ' ನನ್ನ ಮೂವರು ರಾಜಕುಮಾರಿಯರು ಬಂದಿದ್ದರು. ನನಗೆ ಅವರೇ ಆಪರೇಷನ್ ಮಾಡಿಸುತ್ತಿದ್ದಾರೆ. ಇನ್ನು ನನಗೇನೂ ಯೋಚನೆಯಿಲ್ಲ...ಭಾರೀ ನೆಮ್ಮದಿಯಾಗಿದ್ದೀನಪ್ಪ' ಎಂದು ಎರಡು ಬೆಡ್ ನವರಿಗೆ ಹೇಳಿ, ಮೂರನೆಯ ಬೆಡ್ ನವರ ಬಳಿ ಮಾತನಾಡಲು ನಗುತ್ತಾ ಕುಳಿತವರು ' ನನ್ನ ಮೂವರು ಮಕ್ಕಳು...' ಎಂದು ಮಾತನಾಡುತ್ತಿದ್ದಂತೆ ಪ್ರಾಣಹೋಗಿದೆ. ಅದೆಂತಹ ಸುಖಮರಣ.

ಬದುಕಿದ್ದಾಗಲೂ, ಸತ್ತಮೇಲೂ ಅಪ್ಪನ ಜೀವ ನಮ್ಮಿಂದ ಸಾಕಷ್ಟು ' ವಸೂಲು' ಮಾಡಿದೆ. ನಾನು ನನ್ನಮ್ಮನಿಗೆ ತಿಳಿಯದಂತೆ, ಅಜ್ಜಿಗೆ, ಚಿಕ್ಕಪ್ಪನಿಗೆ ( ಅಪ್ಪ ಇಲ್ಲ ಎಂಬ ಕೊರತೆ ನೀಗಿದ ಮಹಾನುಭಾವ) ಮಾತ್ರ ತಿಳಿಸಿ ಅಪ್ಪನಿಗೆ ಪ್ರತಿ ತಿಂಗಳು ಹಣ ಕೊಡುತ್ತಿದ್ದೆ. ನನ್ನ ಅಕ್ಕ ಆಸ್ಪತ್ರೆಗೆ ಹಣಕಟ್ಟಲು, ಔಷಧಿಗಾಗಿ ಎಂದು ಹಣವನ್ನು ಚಿಕ್ಕಪ್ಪನ ಕೈಗೆ ಕೊಟ್ಟಳು. ಆಸ್ಪತ್ರೆಯ ಬಿಲ್ಲು, ಮಾರನೆಯ ದಿನ ಸತ್ತನಂತರದ ಕ್ರಿಯಾವಿಧಿಗಳೆಲ್ಲಾ ಮುಗಿದು ಮತ್ತೂ ಹಣ ಮಿಕ್ಕಿದ್ದಾಗ ಆ ಹಣ ಏನು ಮಾಡುವುದೆಂದು ಚಿಕ್ಕಪ್ಪ ಕೇಳಿದರು. ಅಷ್ಟೂ ಮೊತ್ತವನ್ನು ಅನಾಥಾಶ್ರಮಕ್ಕೆ ನೀಡಿದಳು ಅಕ್ಕ.

ಇಂದಿಗೂ ಅಷ್ಟುಕಷ್ಟ ಕೊಟ್ಟ ಅಪ್ಪನನ್ನು ನೆನೆದರೆ ಮುಖದ ಮೇಲೆ ಸಾರ್ಥಕತೆಯ ಸುಂದರನಗುವೊಂದು ನಮ್ಮ ಮುಖದ ಮೇಲೆ ಮೂಡುತ್ತದೆ. ಜೀವ ಹಾಯೆನಿಸುತ್ತದೆ. ಕಡೆಗುಳಿಯುವುದು ಮಾನವೀಯತೆಯಷ್ಟೆ!!! ಎಂದು ರೇಖಾರಾಣಿ ತಮ್ಮ ಫೇಸ್ ಬುಕ್ ಖಾತೆಯಲ್ಲಿ ಬರೆದುಕೊಂಡಿದ್ದಾರೆ. ( video credit : trp news kannada )